الفسل يمسي في سلاحه مدجَّج

الجِيد ذي يجعَل للاَيمان مخرَج
ماهو بذي يحلف وجزّع يمينه..

والناس بالشيمه طبايع تدرّج
اقوام فيها الوافيه والخوِينه..

والدهر معهد منهجه خير منهج
ذاكر مِن ايامه وراجع سنينه..

مايستووا بالأجر ذي يدوا الحج
والصيف ما مثل الروابع شنينه..

ولا تعيب اعور ولاتشتم اعرج
ولالمستور الخلايق تبينه..

حِب الملا ياصاح والناس واحنَج
لاتجعل الأحقاد وسطك دفينه..

ومن بنى له قصر عالي مزجّج
لاتحسده هي با تزيله سنينه..

ومن يعادي عاد بالحق واحتج
ولاتكثّر في عداه أو تهينه..

الناس مِن آدم وآدم تزوج
حوى وحنّا كلنا من بنينه..

وان شفت غيرك قل عقله ولغج
بالطيب والأخلاق رده لدينه..

اللين والمعروف والطيبه اخرج
ومن نوى للخير ربك يعينه..

والدهر متكفل بسبّار الاعوج
واِسأل على كسرى وقارون وينه..

ولا تطيع ابليس تقرح وتضعَج
ابليس للإنسان مثل الطَبينه..

ابليس باحقاده نزل مِن مدرَّج
والنفس لَجل الجهل صارت سجينه..

واسأل نبيك كيف للعرش يعرج
إلا بطيبه والهدو والسكينه..

المصطفى ذي دَل قومه وزَلّج
خَطب وحذرنا مسالك لعينه..

لايفتنك عالَم مزيَّن مبهرَج
وانظر لعِلم الله واسبح بكونه..

واتل الضحى والناس والنور والحج
من حَب كلمات المهيمن كفَينه..

ماتستوي دعوه وصاروخ وِن رَج
سهم السّحَر يرمي عدوك بعينه..

ولاعلى منكر تظلي تفرّج
بل اِنكره في خاطرك واستهينه..

وكم معلّم من صفوفه تخرَّج
ولا عمل من قدر علمه ثَمينه..

ضاقت عليك اليوم في الغد عتفرج
سهم القدَر ما يدري احّد صَلَينه..

فكّر بعقلك لاتقع شي ممنَّج
العقل ينفع بالظروف الحَرِينه..

والعِلم ذي صدّر جهابيذ.. وانتَج
والجهل دمّر كل حاجه حسينه..

سروي بري في صبل صابي مزنَّج
ولا غضفنر والدماء في عرينه..

الفسل يمسي في سلاحه مدجّج
حتى الذباب بايزعجه في طنينه..

والجيد يشخط في سراجه وسرَّج
يمشي برِي محّد يقُله من اينه..

لاهو معَ حاشد ولاضد مذحج
ولايهمه عنس والا العِدَينه..

كذاب مَن للكذب زيَّن وروَّج
ولاثها من حيث كانت مبينه..

كذاب مَن للأبرياء باليمن زَج
بامواج هوجاء عطّلين السفينه..

كذاب من قصده علينا يتوَّج
ظالم ويشتينا نقبّل جبينه..

ياالله تجي في ذي طبخها وحوَّج
تبهذله يارب وتقهر قرينه..

وختمها صليت ما بارقه فَج
على محمد ذي بعث في المدينه..