وذي كانوا حمايم صاروا اصقار

ثلاثه انفار قوَّمنا القيامه/
ولا اقدرنا نسِد والصين مليار..

ثلاثه انفار نطمح بالزعامه/
ونشتي كلنا نبقى علمدار..

ثلاثه انفار ما نعرف سلامه/
ألا تباً لنا من خمسه انفار..

أكلنا من براميل القمامه/
ولازلنا ملان اعلام واخبار..

وعادينا قطر هي والمنامه/
ولا ابقينا لنا صاحب ولا جار..

على ماذا؟ وقالوا عالكرامه/
ألا أيَّن كرامه وايّن اعذار..

معارك ضاريه صنعاء تهامه/
ربشنا ام العرب والعالم احتار..

قتلنا القبيَله هي والشهامه/
وعاد احنا نسمي بعضنا احرار..

سلبنا الطفل حق الإبتسامه/
وذبَّحنا العساكر مثل الاثوار..

ونص اطفالنا قد هم يتامه/
ونص الشعب رابط بطنه احجار..

وذي كان الغراب اصبح حمامه/
وذي كانوا حمايم صاروا اصقار..

وصار الليث في فمه فدامه/
وراح القرد يرقص فوق الانمار..

وروس الأمر وابناء الحرامه/
ترقِّصنا على طبله ومزمار..

شلل واحزاب ضد الشعب قامه/
ولجل الحزبيه ضيعت الاذكار..

وصار الحزب داري والمُقامه/
وهو ذي أسسه سارق وسمسار..

بفندق هاي محجوز الإقامه/
وفي فله ونا من دار لا دار..

وشرِّه لي وخيره للفخامه/
تقل ماعد معانا اسماع وابصار..

ولو نعقل وبطلنا العدامه/
ونوقف كلنا في وجه الاشرار..

ونرمي من تمرد بالملامه/
ونبقى كلنا للمخلص انصار..

يمين الله ما تقدر زعامه/
ولا امريكا علينا لو رمت نار..

ولكنَّا تَجَرنا بالكرامه/
وبعنا الشعب في درهم ودينار..

وغطينا بوجه الحق ويامه/
سكتنا عالسرق يوم الحياء بار..

كلاماه ياكلاماه ياكلامَه/
نجي دجالها والكاذب احتار..