شعر حميني إهداء للحبيب وفناني اليمن

بالله ياطيـر شِـل الظَّـرف بالمنقار=
واِحمل حروف التهاني والتباشيري..

واِنقل رذاذ الهواجس طَل فوق ازهار=
ضخَّيتها للحبايب من نوافيري..

في عيد شوال واول يوم للإفطار=
غادر مع الصبح باكر دون تأخيري..

عندي مرض قلب قالوا:سو له منظار=
والقلب ماهو علاجه بالمناظيري..

كل الجهازات دقت لي جروس انذار=
حاله خطيره و لاداعي لتأخيري..

لاكشفيه باتشافي قلبي المنهار=
ولاتجسد خيالي والتصاويري..

إلا رباب اللغه والناي والقيثار=
والهاجس اللي سباني بالتعابيري..

الشعر دكتوري اللي للألم جبار=
والحرف واللفظ والجمله عقاقيري..

ياكيف انا اسلا وجسمي بالدماء فوار=
والقلب مثل الذي تحته دوافيري...

وكيف شاارتاح وانا نوم عيني طار=
بالفرش مثل الذي تحتي مساميري..

حتى شرابي وزادي صار لي قِطّار=
مثل الذي يشفطوا له بالمواصيري..

والهاجس اَضنى فؤادي والقليب اشعار=
قد ينشف البحر وانا مانشف بيري..

نزفت فوق الورق دمعي مع الأحبار=
حتى شكى الدمع إسرافي وتبذيري..

أتعبت قلبي هوى يوم الهوى جوار=
واقلقت عقلي بتخييلي وتفسيري..

بنيت لك في فؤادي والحنايا دار=
رخام مقصوص وادواره عباصيري ..

سويت لك من عروقي والضلوع اوتار=
انغامها اَعذب من اصوات المزاميري..

واَوقفت لك لحم. قلبي مبخره للنار=
واَحرقت لك عطر جاوي من تباخيري..

يااغلا عليا من الدينار والدولار=
واجمل من الكون كله حسب تقديري..

حررت لك شعر شافي يلحبيب البار=
وانا أسير الهوى ماتم تحريري..

أنت اللغه كلها والعود والمزمار=
واعيانك اسلوب إغرائي وتحذيري..

والليله الليل طاب الجو ياسمار=
وطاب شعري معي واطرَب جماهيري..

سِلِمت ياهاجسي ياغيثـي المِدرار=
يااللي لك البيض تزجل بالمحاجيري..

قهرت الاعداء وخليت الحسود احتار=
واصبحت محسوب من بين المشاهيري..

يسمع هديلك صديقي والعدو والجار=
مِن المواطن إلى ذي لابس الميري..

والله ماارجع وراء وانا أخو عمار=
وانا ابن مغوار واصحابي مغاويري..

والله مااجري وراء درهم ولا دينار=
يالعنة الله على عبد الدنانيري..

والله مااذل وابي ذاك الفتى المغوار=
حاشاي لو ينشروني بالمناشيري..

واهل اليمن كلهم عندي رجال احرار=
يستاهلوا كلهم حبي وتقديري..

وانا اسأل الله يكفي شعبنا الأخطار=
ويسلِم الناس شر الظلم والضَّيري..

والله يجعل مساكنا ظلال اشجار=
والله يجعل. خواتمنا على خيري..

في جنة الخلد تجري تحتها الأنهار=
شرابها اكواب عذبه،لحمها طيري..

والضو فيها من العرش العظيم انوار=
والحور في حسنها دون الكوافيري..

.وانا اسأل الله يحشرني مع الأخيار=
مااطيق عيشة لظى لاتم تزفيري..

.في يوم فيه الرسل والأنبياء تحتار=
والناس لله محشوره طوابيري..

ختمتها بالصلاه مايقروا الاذكار=
واعداد ما تشدي اصوات العصافيري..

على النبي ذي حماه الله وسط الغار=
وطهره من عيوب النفس تطهيري..